De Malpica a Niñóns. Camiño dos Faros


1.678 visitas – 1 estrela2 estrelas3 estrelas4 estrelas5 estrelas (2 votos, media: 4.00 de 5)
Loading...

Ruta de Malpica a NiñónsPara facer este itinerario seguimos a primeira etapa do Camiño dos Faros, unha senda de 203,50 quilómetros que enlaza os faros da Costa da Morte, de Malpica a Fisterra. A ruta parte de Malpica e vai ata a praia de Niñóns practicamente todo o rato pegada á costa, por zonas de cantís. O percorrido ten un altísimo valor paisaxístico e goza dunha extraordinaria beleza. 

  • Lonxitude da ruta: 24 km aprox.
  • Desnivel: medio
  • Dificultade: media-alta

Logo de dar un paseo pola vila e reagruparnos no porto malpicán, iniciamos o percorrido polo Caldeirón para chegar a súa praia de Area Maior, continuamos cara ao cabo de Santo Adrían por un camiño ben acondicionado, moi lonxe de aquel que percorrían hai anos os romeiros a mediados de xuño para chegar ata a ermida dende a igrexa parroquial. Lembro que me levaron os meus tíos de neno e teño gravada a imaxe de moitísimos coches aparacados na beira do camiño e moitísimos tolleitos pedindo esmola. Cruzamos a praia de Seaia e tomamos a pista de terra que sube a Santo Adrián; alí, no seu mirador fixemos a primeira parada e desfrutamos dunhas vistas panorámicas sobre toda a enseada de Seaia e Malpica. Estamos xusto fronte ás illas Sisargas, a unha milla escasa de nós, e a case 200 m sobre o nivel do mar. As illas van ser referencia durante case todo o percorrido!

Acompáñanos todo o rato unha chuvieira fina que non cesará ata despois de xantar (e MeteoGalicia pronosticando chuvia para o final do día!), pero a temperatura é excelente para camiñar. O camiño xa nos vai amosando o que imos ver nesta etapa, alternancia de praias cunha costa de cantís que percorreremos a pouca altura. 

Continuamos ata Beo por un camiño de pescadores que bordea toda a costa fronte ás Sisargas. Espectacular cando pasamos por pequenos treitos moi preto dos cantís, pero para nada complicados (eu levaba os meus temores polo do vértixe, e non o notei en ningún momento). 

praia de Beo recibiunos toda sementada de argazo, do que estaban recollendo os veciños un bó tractor para logo abonar as súas terras. Desde alí subimos ata a aldea de Beo con moito coidado polas esbaradizas escaleiras de madeira, que non me canso de repetir o inapropiada que é a madeira dos “paseos marítimos e fluviais” para camiñar por ela.

E de Beo á Praia de Seiruga, onde nos atopamos cunha pequena e agradable dificultade: hai que cruzar o regato (pequeno nesta época do ano). Hai que descalzarse, subir o pantalón por riba das rodillas e buscar o mellor sitio para cruzar (ollo, que hai zonas nas que te enterras ata as rodillas). Creo que houbo un que non precisou descalzarse e cruzou sen problemas, pero outros que o tentaron acabaron coa bota na auga. Co que lle presta aos pés esa auga fresquiña! Iso sí, hai que sacar ben as areas e secarse ben pois aínda queda moita etapa e levar areas nos pés pode ser un incordio.

Saimos do areal pola pasarela e un pouco máis adiante decidimos facer unha pequena parada para xantar, pequena por mor da persistente chuvia, pero o día comezaba a abrir e de camiño ata o areal de Barizo xa parou de chover definitivamente. Ao final da enseada de Barizo, baixo os cantís, podemos ver o pequeno porto coas embarcacións locais. En Barizo, xa estaba programado, houbo que decidir quen continuaba ata Niñóns e quen decidía deixalo neste punto. Este grupo, con 16 km nas pernas, dirixiuse ata Mens, lugar no que recomendo admirar a súa igrexa románica de Santiago, as súas tres ábsides, os canzorros… agardo que Suso me mande fotos, pois hai algún que outro irreverente que paga a pena amosar.

O resto enfiamos cara ao faro de Punta Nariga. O entorno de Punta Nariga é espectacular! As formacións rochosas están afectadas pola constante acción erosiva do vento e da auga, e nelas apreciamos as máis variadas formas, polo que hai que deixar que traballe a imaxinación: elefantes, figuras antropomorfas… Contoume Xerardo que cando fixeron a ruta neste inverno, o forte vento non os deixaba descender as escaleiras (supoño que ese sería un dos motivos polos que instalaron no cumio do monte unha chea de aeroxeneradores).

O faro é fermoso. A construcción de César Portela inaugurada en 1997 mide 28 m e a súa luz ten un alcance de 22 millas (uns 41 km). Está estructurado en tres corpos e simula a proa dun barco introducíndose no mar. No mascarón, unha escultura de Manolo Coia, un atlante, convértese nun lugar perfecto para admirar a paisaxe… e para facer a foto.

O camiño que nos queda é impresionante, do mellor da ruta, e non o digo para amolar aos que non viñeron, pois é moi esixente e hai que ir con todos os sentidiños, xa que voltamos a camiñar pegados á costa de cantís camiño da Enseada do Lago e Niñóns; un tramo de costa espectacular que percorremos con subidas e baixadas de vértixe  mentres contemplamos como o mar bate nesta impresionante enseada e tendo todo o perfil do Roncudo á fronte!  Logo, despois duns dous km, chegamos a un sendeiro que nos leva ata a praia de Niñóns, polo que só queda chegar ata o bus, onde está o resto dos compañeiros, que nos agarda na igrexa de San Xoán, en Niñóns, onde damos por rematada a ruta.

Desta vez sí que foron moi necesarios os estiramentos, e a cervexa que tomamos en Pazos soubo a gloria!

Esta é a primeira ruta que fixen do Camiño dos Faros coa USC, pois non tivera ocasión de facelo con outros compañeiros ou cos Traskis, que así se chaman os organizadores e que non quixera deixar de comentar o agradecemento polo bo facer dos organizadores do Camiño dos Faros, polo efecto dinamizador que está a ter en toda a Costa da Morte. Parabéns!

Ver De Malpica a Niñóns. Camiño dos Faros nun mapa máis grande



Galería

De Malpica a Niñóns. Camiño dos Faros


6 comentarios en “De Malpica a Niñóns. Camiño dos Faros”

  1. Fermosísimas fotos Fran, coma sempre, e fermosísima ruta. Eu fíxena tres veces cos Traskis, e non me canso de facela. Fran, na próxima ruta, sauda e dalle unha aperta da miña parte a tódolos/as compañeiros/as, unha aperta

  2. Ruta para salvar a Fraga das Casas Vellas (Lalín)
    DOMINGO 2 NOVEMBRO
    URXENTE! PRECISAMOS AXUDA PARA SALVAR UNHA
    FRAGA EN PERIGO POLA INSTALACIÓN DA LIÑA DE
    ALTA TENSIÓN DE FENOSA!!
    A Fraga de Casas Vellas corre serio perigo. O proxecto
    da empresa Gas Natural-Fenosa contempla a corta
    dunhas 2.000 árbores para levar a liña de alta tensión ata
    Lalín. Aínda que existen alternativas que eviten o
    estrago, a empresa quere impoñer os seus intereses
    económicos por enriba dos dos cidadáns.
    Temos pouco tempo, pois a corta empeza en Novembro.
    A Plataforma para Salvar a Fraga de Casas Vellas
    pide axuda aos sendeiristas de toda Galiza para realizar
    unha ruta reivindicativa (por corredoiras e fragas).
    INFORMACIÓN SOBRE A RUTA:
    Día: domingo 2 de novembro (12 km pola mañá).
    Hora da xuntanza: 9:15 diante do Concello de Lalín (no
    novo) Logo desprazarémonos nos coche ata o Local social de
    Catasós (na N-525, a 3 km dirección Ourense, coller a pista ao
    lado da Taberna O Cazador). Hai onde aparcar. Alí iniciarase
    a andaina (de 10:00 a 14.00 horas, dificultade media-baixa).
    INFORMACIÓN SOBRE O TEMA:
    https://www.facebook.com/salvemoscatasos
    PARA ANOTARTE ou informarte:
    No blog do Grupo Sendeirista Érbedo:
    http://erbedo1.blogspot.com.es/
    http://erbedo1.blogspot.com.es/2014/10/ruta-para-salvar-fraga-dascasas-
    vellas.html (nesta entrada hai un enlace para anotarse
    individualmente por provincias)
    No seu e-mail: erbedo1@gmail.com
    Tfno. contacto: 628 884 924
    Por favor, difunde a ruta entre os grupos
    sendeiristas que coñezas!!!!
    Salvemos o noso patrimonio natural!

  3. !Que roteiro precioso y fotos bonitas! Estamos muy agradecidos que podemos acompañaros y conocer a estas zonas hermosas de Galicia. Saludos, Jóhanna &Helmut

    • Gracias Jóhanna!! y no sabes lo orgullosos y felices que estamos de que nos acompañeis.Yo espero que nos sigáis acompañando durante el tiempo que viváis en Santiago. Besos y saludos a Helmut

Deixa un comentario

*

Este sitio emprega Akismet para reducir o spam. Aprende como se procesan os datos dos teus comentarios.