Courel. Ruta do Val do río Pequeno
Esta fin de semana fun ao Courel! unha boa estadía outonal por esas terras que tan ben describiu e poetizou Uxío Novoneyra. Un grupo de amigos que frecuentan os roteiros da USC, ademáis de Ánxeles, Paché e Suso, fomos desfrutar dun par de días polo Courel; tendo como posto base Seoane do Courel, Savane para moitos, aloxámonos en Casa Ferreiro, que recomendo vivamente. A casa non é moi bonita pero con bo servizo, boa atención e boa comida.
Xa que estou, tamén recomendo a Guía do Courel elaborada por Javier Guitián, Luís Guitián e José L. Martínez Villar, unha proposta de fácil manexo coa que se pode coñecer en pouco tempo os puntos claves da terra de Novoneyra, considerada como o corazón natural do noso país. A través de 22 rutas excepcionais, con valiosísima documentación, temos a oportunidade de percorrer as paisaxes desta serra, dando a coñecer lugares que hoxe poderían ser modelo de xestión do medio natural e descubríndolle ao viaxeiro a súa vexetación, os mellores bosques, as especies ameazadas e, en definitiva, a beleza e autenticidade dunha paisaxe sobre a que se fundamenta o turismo rural.
Entre as numerosas rutas que hai para descubrir esta paraxe natural e gozar da natureza, fixemos o sábado a do Río Pequeno e deixamos para o domingo un pequeno paseo desde o Alto do Couto ata a fonte de Monte do Cervo na fermosa Devesa da Rogueira. Durante as andainas, o tempo non acompañou moito pois choveunos durante todo o seu pecorrido, pero unha vez rematadas, e como nunca choveu que non delampase, pudemos desfrutar dos paseos por Seoane, Folgoso ou A Seara.
A Ruta do val do río Pequeno comeza no mesmo Seoane, remontando o río Pequeno en dirección a Paderne. Con pendentes moderadas, pasamos pola Aldea do Mazo e as Cabanas dos Carballois. Estamos indo polo vello camiño que unía Pedrafita con Seoane entre interminables soutos. Para chegar a Paderne tivemos que cruzar varios regos, así como subir unha pequena costa antes de chegar á aldea de Paderne, con varias casas de turismo rural, que atravesamos para volver baixar ao río (o tempo non axudou moito para poder desfrutar destes paraxes).
Desde o río comezamos o duro ascenso ata o Chao Grande, cerca do Castro de Brio, desde onde debe haber unha vista espectacular que non pudemos apreciar polo cuberto que estaba. O que sí atopamos foi aos do motocross de rigor que andan polos roteiros sinalizados… e aínda teñen que dicir! Xa cando o sendeiro comeza a baixar e ser máis doado, volvemos entrar en valiosos soutos característicos desta terra, que nos dirixen sen perda ata Mercurín. A parte baixa deste bosque chámase Val das Mouras, pola súa beleza, ao que continúa un magnífico aciñeiral nas denominadas Taras de Mercurín, desde onde proseguimos o descenso cara a Ferrería; aquí o grupo dividiuse e uns fomos ata Seoane pola estrada que ven de Folgoso, e outros fomos ata a Ferrería Nova, e dende aquí, tras un pequeno ascenso, chegamos de novo a Seoane, que é realmente o percorrido do sendeiro.
E así rematou o día do sábado, en Folgoso mercando noces e mel (as castañas reserváronas para o domingo que celebraban a Festa da Castaña), e que despois da chuvia da mañá regalounos unha bonita posta de sol entre nubes. Volta para Seoane que nos agarda o cordeiro na mesa!… e sesión fotográfica de Picos, Pola de Gordón e roteiros de Suso!
Ver Courel. Ruta do Río Pequeno nun mapa máis grande (Autor: jesussimon)
