Brañas la Seita e Zarameo. Cuevas del Sil

30-05-2025
Braña de Zarameo
Braña de Zarameo, unha das brañas mais belas e mellor recuperadas

A ruta comeza na localidade de Cuevas del Sil e vai remontando o val do río La Seita ata chegar á braña que leva o seu nome. Goza dunha extraordinaria beleza e unhas paisaxes marabillosas. Unha vez chegados á braña de La Seita, seguimos avanzando polo camiño que nos conducirá á seguinte braña, a de Zarameo. Atravesamos por un fermoso bosque, o bosque do Reventón, que nos deixa ao pé da braña de Zarameo.
Regresamos polo mesmo camiño a Cuevas del Sil, onde rematamos a actividade.

O camiño é moi doado e vai case todo o tempo entre bosques ata chegar á parte alta.

MIDE

  • Horario: 3:26 h.
  • Desnivel de subida: 682 m
  • Desnivel de baixada: 682 m
  • Distancia horizontal: 11,15 km
  • Tipo de percorrido: Ida e volta
  • Severidade do medio natural:
  • Orientación no itinerario:
  • Dificultade no desprazamento:
  • Cantidade de esforzo necesario:
  • Dificultade: Media

Comezamos a camiñar…

Hoxe tiñamos pensado coroar o Alto de Terreiros, un cumio situado no sur de Babia, xa no límite con Omaña, pois esta saída era monográfica por terras babianas. As previsións meteorolóxicas mandan e non son moi boas para andar pola motaña, polo que Víctor optou por cambiar de ruta sobre a marcha.

Como estamos aloxados no albergue Francisco Giner de los Ríos, buscamos unha zona con escasa probabilidade de chuvia e Víctor optou por realizar unha ruta polo Alto Sil, preto de Villablino, por se o día se torcía. A que imos facer non é unha ruta de montaña, pero si unha ruta de enorme beleza, tendo varios elementos de interés, como o bosque El Rebentón, un bosque de moita biodiversidade, as vistas panorámicas e as propias brañas da Seita e Zarameo, que recorreremos.

A luz do día indícanos que non vai tardar en chover
A ponte sobre o Sil pola que temos que cruzar
Protexidos da chuvia baixo os aleiros das primeiras casas de Cuevas

Lémbrome que esta ruta das brañas xa tivo en febreiro de 2016 o seu percance, pois as chuvias torrenciais que padecemos aquel día, fixo que non continuáramos ata a braña de Zarameo. A parte positiva de dar a volta na braña da Seita foi pensar que sempre podemos regresar e rematar o traballo… e chegou o día!

Preparámonos nunha curva da vella estrada onde o bus non tivo problemas para aparcar. Este é un bo lugar para deixar o coche pois non existe moito aparcamento á beira da estrada. A luz do día indícanos que non vai tardar en que a chuvia faga acto de presenza. Efectivamente, nada máis comenzar a andaina tivemos que protexernos dela abeirándonos baixo os aleiros das primeiras casas de Cuevas, antes de baixar ao río. Pero as previsións apuntan a que esta chuvieira vai pasar decontado. Malo será que non poidamos acadar desta vez a braña de Zarameo!

Cruzando o Arroio da Reguerona, hoxe por pontella, en lugar de descalzarnos como hai anos
Superando a braña de La Seita, a 1.200 m, nunha localización sensacional

Rapidamente saímos da pequena localidade pola súa ponte sobre o río Sil, que conserva un arco de medio punto e o resto de cemento, para cruzar posteriormente as antigas vías do tren mineiro Ponfeblino. Tras salvar as vías do tren, case imperceptibles, entramos na pista que nos conducirá cara ás brañas. Tras un xiro á esquerda cruzamos a horta e os campos de cultivo vanse transformando nun bosque atlántico regado polo arroio da Seita. Se por algo destacan os bosques do Alto Sil é polo seu elevadísimo grao de conservación ademais das súas extensións.

Así como hai nove anos o tempo non axudou, pois todo o percorrido fixémolo baixo unha persistente e intensa chuvia, hoxe estamos a ter un día primaveral no que finalmente saiu o sol en todo o percorrido, logo desa chuvieira inicial.

No Bosque do Rebentón, un espazo de enorme beleza
Na parte alta do bosque, xa podemos ver a braña de Zarameo
A medida que nos achegamos apreciamos a dimensión da braña

Cando levamos sobre 3 quilómetros entramos na braña da Seita. Para chegar a ela, cruzamos por unha pequena ponte de madeira que salva o regueiro que pon nome á braña. La Seita atópase a 1.200 m nunha localización sensacional e conta cunha ducia de cabanas ademais dunha fonte. Que diferente a cando a visitamos en 2016!

A partir de agora, cando saiamos da braña pola parte alta, emprenderemos o camiño que non puidemos facer. A pista vaise transformando nun carreiro cunhas ramplas máis importantes que as do primeiro tramo. O bonito carreiro vai penetrando no Bosque do Rebentón. Sen dúbida, a zona é dunha beleza difícil de describir, algo que agradecemos despois de tanto sufrimento. O nome déixao ben claro! A pesar diso, que subida! Que camiño! Que bosque!

Aproveitamos a sombra das vivendas para descansar e xantar un pouco
As vistas dende a braña son espectaculares
Achegámonos ata a fonte gozando da paisaxe e das construcións brañeiras

Situada xa a 1.500 m de altitude, podemos divisar unha espectacular braña moi ben conservada, a máis grande e alta do Alto Sil, onde facemos un prolongado descanso despois da intensa subida desde La Seita. As vistas desde aquí xa son sensacionais, destacando en especial o Cornón de Laciana. Paga a pena pararse a percorrer a braña e contemplar as espectaculares vistas.

A braña de Zarameo supera as 22 cabanas e nesta contorna pasaban os pastores os veráns acompañados do gando, maioritariamente vacas. Hoxe é unha das brañas mais belas e mellor recuperadas, moitas delas restauradas para uso persoal, polo que se pode dicir que é a máis representativa de todo o Alto Sil e Laciana, atopándose nunha localización inmellorable. Esta braña pertence a Matalavilla, localidade que tamén forma parte de Palacios del Sil, situada na vertente oposta á que ascendemos dende Cuevas.

As cores primaverais están no seu esplendor
Chegando á braña de La Seita volvemos gozar dos espazos abertos
Cuevas do Sil dende a outra beira do río Sil

Por último, descenderemos por todo o val, atravesando de novo os magníficos bosques ata regresar de novo a Cuevas do Sil, completando desta forma esta excepcional ruta.

Segundo imos descendendo polo val, imos comentando a ruta que tivemos, entre risas e alegrías! Debemos cruzar o Arroio da Reguerona, xa próximos ao final do val, por unha pontella que hai nove anos non existía, cando tivemos que descalzarnos para cruzalo. En pouco tempo chegamos á zona moito máis aberta e dando vista a Cuevas do Sil. Finalmente, volvemos cruzar a ponte sobre o río Sil e percorremos as rúas do pobo, chegando á altura da estrada, e onde damos por rematada a ruta.

Deixar un comentario

O teu enderezo electrónico non se publicará Os campos obrigatorios están marcados con *

Scroll ao inicio