Cueto Nidio desde Rabanal de Abajo

12-11-2023
O camiño ata a Braña de Cubajo vai entre un fermoso bosque

O percorrido inicial parte dende Rabanal de Abajo ata a Braña de Cubacho/Cubajo por camiños bastante cómodos, nun entorno dunha beleza extraordinaria. Unha vez chegados ás Brañas de Cubacho (1.365 m) achegámonos ata a súa parte alta, as Brañas de las Milindriegas. Tras a visita ás brañas, continuamos camiño ata a campa de La Chaviada (1.629 m) e só queda continuar pola pista para todoterreos e acometer o ascenso ao Pico Cueto Nidio (1.773 m).

Dende a cima do Cueto Nidio vense todos os grandes picos da zona, ademais de gran parte do val de Laciana, destacando Villablino. Regresamos á pista e tomarémola para baixar. Non fará falta achegarse outra vez ás Brañas de Cubacho aínda que si pasaremos cerca. Xa non hai perda ata Rabanal de Abajo.

MIDE

  • Horario: 3:30 h
  • Desnivel de subida: 807
  • Desnivel de baixada: 807
  • Distancia horizontal: 13,78 km
  • Tipo de percorrido: Ida e volta
  • Severidade do medio natural:
  • Orientación no itinerario:
  • Dificultade no desprazamento:
  • Cantidade de esforzo necesario:
  • Dificultade: Media

Comezamos a camiñar…

Despois de dous días camiñando polas terras de Laciana, hoxe é día de regreso, pero antes de iniciar a viaxe imos percorrer unha ruta, que non era a inicialmente prevista, subir ata as brañas de La Seita e Zarameo, pois houbo que desbotala polas intensas chuvias de días pasados que deixaron os camiños con moita auga, o que aconsella deixala para outra ocasión.

Unha vez que deixamos o aloxamento no Albergue Giner de los Ríos (como sempre, espectacular), desprazámonos dende Villablino ata Rabanal de Abajo, no extremo sur do val de Laciana, á altura do encoro de Las Rozas, que está a rebosar. Xa tiñamos parado noutra ocasión en Rabanal, dende onde iniciamos unha das rutas máis fermosas que lembro por estas terras: a subida ata La Brañina hai xustamente sete anos. Supoño que realizala en outono, como hoxe, tería moito que ver nesta percepción ao camiñar por un bosque que é todo un espectáculo.

Logo de prepararnos na praza, onde un par de paneis nos ilustran sobre Rabanal e a Ruta ata o Nevadín, saímos xa en subida polo medio do pobo. Celia chámame a atención sobre unha casa en ruínas cun fermoso escudo de armas na súa fachada. Segundo se indica no panel que acabamos de ler na praza, pertence á familia dos Cuesta coa lenda En la batalla de Clabijo bien se conoció mi espada. Logo de ver o escudo dirixímonos cara a pequena igrexa de San Adriano (s. XVII), para despois tomar o camiño que ascende entre muros de pedra que separan os pastos. Desbotamos o sinal que conduce á fervenza do Pimpanón e tomamos o camiño cara á esquerda, en dirección a Rabanal de Arriba.

Os primeiros pasos entre prados anuncian a fermosura da andaina
Encoro de Las Rozas ao pé de El Miro de Tejedo
Desde a pista contemplamos un extenso bosque mixto

Camiñamos por Rabanal de Arriba dirixíndonos á súa parte alta, tomando unha rúa que pronto se converte en camiño. En constante ascenso, imos admirando a paisaxe que temos á nosa dereita, Rabanal de Abajo, o encoro de Las Rozas a rebosar e El Miro de Tejedo co cumio medio tapado polas nubes. Pero pronto os frondosos bosques das abas de enfrente, formados principalmente por bidueiro, hanos sorprender; ademáis coincídenos a subida cando empeza a incidir a luz solar no noso percorrido, pola hora temperá na que andamos, producindo imaxes marabillosas. Que fermoso día temos para camiñar!

Braña de Cubacho/Cubajo

Nestes primeiros quilómetros, o camiño non presenta ningunha dificultade. É un paseo ata a Braña de Cubacho/Cubajo, á que chegaremos tras case tres quilómetros e medio de constante subida, aínda que non pronunciada. Nada que ver coa subida de onte á Braña de Buenverde! Durante todo o camiño imos admirando un extenso bosque mixto cunhas cores ben fermosas, que ocupa as escarpadas abas que temos á fonte. Predominan os bidueiros, aínda que tamén vemos carballos e capudres. Seguindo as lazadas do camiño, cruzamos entre varias das cabanas dos brañeiros, as outseras onde conservaban o leite ou os peches dos prados. Unha das casas semella ser un bar-albergue.

Braña de Cubacho cara ao Nevadín e o Miro de Rabón, con neve e tapados polas nubes
Superadas as brañas, no ascenso imos apreciando as antenas que coroan o Cueto Nidio

Sen parar, continuamos polo camiño que ascende ata as últimas brañas da parte alta, coñecidas como as Brañas de las Milindriegas. Logo dun pequeno descanso, no que gozamos dunhas vistas moi bonitas cara ao Pico Nevadín, O Miro de Rabón e os profundos e espectaculares vales que os rodean, regresamos á ruta sen maiores complicacións, seguindo por unha senda ancha e sen perda.

Cueto Nidio

Toca afrontar a última parte da ascensión. Chegamos á pista que sobe da Braña de Cubacho/Cubajo e viramos á dereita para continuar subindo cara ao Cueto Nidio. Seguimos un desvío máis cara á dereita, ata acadar un abrevadeiro para o gando, onde decidimos facer unha pequena parada para reagrupármonos. Neste punto, parte do grupo decide achegarse ata a pequena campa de La Chaviada (1.629 m), e o resto continuamos ata a cima de Cueto Nidio. A pista non ten ningún atractivo, tan só as vistas que nos brinda a altura gañada.

Finalizado o ascenso, duro no último tramo, chegamos á cima do Cueto Nidio (1.773 m). No cume, ademais das torres de comunicacións coas súas correspondentes casetas (dunha delas sae un forte ruído moi molesto, como dun compresor, que nos vai acompañar todo o tempo), tamén destaca unha gran cruz de formigón. En tempos pasados tamén había unha mesa informativa onde se nomeaba o amplo panorama que se abre ante nós. Por desgraza, do panel Informativo da cima só queda a estrutura, que afea bastante o lugar, por certo.

O Pico Cornón, o Pico Muxivén, as montañas próximas a Babia, Pena Ubiña…
Cueto de Arbás, Villablino no fondo do val de Laciana

Vistas moi fermosas desde o cume, divisando os xa citados cumes do Pico Nevadín e O Miro de Rabón, que vimos dende Cubacho, cunha neve incipiente e medio tapados polas nubes. Rocío vainos amosando os picos que temos diante Pena Vendimia, O Miro de Tejedo, o Cueto de Arbás (o dousmil máis occidental da Cordilleira Cantábrica); cara ao norte, o Pico Cornón, o Pico Muxivén, as montañas próximas a Babia, Pena Ubiña, a Serra de Villabandín, o Pico da Turria, o Pico da Mira, as grandes montañas do Alto Sil, moitas delas tapadas polas nubes… e unhas vistas excepcionais do val de Laciana, con Villablino en primeiro termo. Breve parada para gozar da panorámica, fotos individuais, de grupo, descansar e toca baixar para reunirnos co resto da xente.

Mentres descendemos, gozamos das impresionantes vistas cara ao Nevadín e o Miro de Rabón, que siguen medio tapados polas nubes. Salvo o paso por un pequeno tramo de pista embarrada, o descenso facémolo rápido. O grupo que quedou na campa, xa iniciou o regreso hai tempo e imos con paso lixeiro para tentar alcanzalos. Non fai falta pasar de novo polas Brañas de Cubacho, aínda que si pasamos cerca, e recuperamos o camiño de subida.

No camiño de regreso pasamos cerca da braña de Cubacho
Chegando a Rabanal de Abajo, co Miro de Tejedo e o encoro de Las Rozas á fronte

Xa na parte baixa da ruta, as árbores vanse despexando e volvemos gozar dunhas fermosas vistas cara a Rabanal de Abajo e o encoro de Las Rozas (debe ser dos primeiros encoros dos moitos que ten o Sil no seu percorrido), e pouco a pouco, casi sen decatarnos, estamos de volta en Rabanal de Arriba. Antes de cruzalo, aproveitamos o muro dunha finca para xantar tranquilamente, tranquilidade alterada cando vemos baixar as vacas polo camiño cara a nós mentres recollemos e continuamos camiño. Só nos queda descender cara a Rabanal de Abajo, camiñar de novo entre os fermosos prados que hai entre os dous pobos e chegar a lugar no que aparcamos, dando por finalizada a ruta.

Mudámonos e iniciamos a viaxe de regreso gravando no caletre esta fermosa ruta polos bosques de Laciana, coñecendo a Braña de Cubacho e chegando ata o cume do Cueto Nidio, un miradoiro perfecto cara á preciosa comarca de Laciana. Esta terra nunca defrauda!

Deixar un comentario

O teu enderezo electrónico non se publicará Os campos obrigatorios están marcados con *

Scroll ao inicio